و انت ماشي بتسيب حاجات كتير
جمله قريتها في كتاب خليتني قعدت افكر قدامها كتير
قعدت اركز كده و احاول ارجع بالذاكره لورا شويه و اسال نفسي يا ترى ايه الحاجات اللي و انا ماشي سيبتها ورايا
بعد حوالي 5 دقايق كده لقيت نفسي بقول واحد .... اتنين .... تلاته ..... اربعه....... و العداد ماشي مكمل كل ما احاول اوقفه الاقيه عاوز يكمل مع اني مش كبير قوي هما 21 سنه معقول سبت ورايا حاجات كتير كده ....
طب لو هنحسب المهم اللي سيبناه هنلاقيه ايه ؟؟!!!
- سبت حاجه كان نفسك تجيبها و معرفتش فصرفت نظر ؟
- حاجه كان نفسك تعملها و معملتهاش ؟
- صديق كان نفسك يشاركك مشوارك و سيبته او بمعنى ادق سابك هوه في نص الطريق؟
- حبيب اديته كتير قوي و مخدتش منه فا سيبتو بعض - و ساعتها مش فارقه مين ساب مين - عشان اكيد مادام انت مخدتش منه يبقى لازم تسيبه .
- طموح في حياتك حاولت تحققه و لقيت الدنيا ممشياك في سكه تانيه خالص فا قررت تسيب السكه الاولانيه ؟.
- حاجات كتير قوي حبيتها و اتعلقت بيها و فجأه راحت ؟
انت مكنش قصدك تسيب الحاجات دي ولا هيه برضو قصدها تروح منك بس للاسف راحت.
ممكن تكون عارف راحت ليه و ممكن تكون مش عارف ! بس في النهايه سيبتو بعض
مش عارف حاجات كتير في دماغي جت بس هقول ايه ولا ايه؟؟؟
العداد لسه مكمل في حاجات مهمه و حاجات مش مهمه بس فعلا سيبتها ورايا .
خايف الطريق يطول و المسافه تكبر و افضل اسيب و اسيب و اسيب ... بارادتي و من غير ..
مش عارف ايه اللي هيحصل بعد كده ؟
بس بجد مش عاوز اسيب حاجه تاني او على الاقل لما اسيب اسيب بمزاجي
ده اقل حق ليه في حياتي و حياتك و حياته و حياتها
و حياه اي حد ...
ده كلام بجد ؟؟؟ ولا في شئ جد ؟!!!!!!
هناك تعليق واحد:
بجد يا عماد لمستتى اوى من جوايا .. اعتقد ان اى حد هيقراها بردو هتلمس جواه حاجات وهتعلق معاه .. كمل فى المنطقة دى
إرسال تعليق